Policia kolumbiane prezantonte sot identikitët e vrasësve të dyshuar të prokurorit paraguajan anti-droga Marcelo Pecci, që humbi jetën teksa ishte me pushime në Kolumbi. Pecci u qëllua dje për vdekje teksa ishte me gruan e tij në një ishull kolumbian të Karaibeve, nga sulmues që erdhën e u larguan nga deti. Prokurori u vra në qytetin bregdetar të Cartagena, teksa ishte në plazh me gazetaren Claudia Aguilera, ku kishin ardhur pas martesës së tyre në prill. Bashkëshortja e tij e cila shpëtoi pa u lënduar, tha se sulmuesit u larguan me një motor uji pasi kishin qëlluar dy herë Marcelo, një herë në kokë e një herë në kurriz. Duke treguar sesi vrasësit u larguan po nga deti ajo tha: “Ne na ndihmuan njerëz të tjerë që ishin në plazh por ai kishte vdekur. Nuk kishim marrë kërcënime më parë, çdo gjë ndodhi kaq shpejt”. Presidenti paraguajan Mario Abdo Benitez dënoi vrasjen ‘burracake’ dhe u zotua të ashpërsonte luftën kundër krimit të organizuar. Pecci ishte duke hetuar krime të profilit të lartë në Paraguay, duke përfshirë dhe vrasjen e një trafikanti drogash dhe bashkëshorten e një futbollisti të njohur. Paraguai është një nga prodhuesit më të mëdhenj të marijuanës në Amerikën Latine, e cila trafikohet kryesisht përmes Argjentinës.