Një sasi e konsiderueshme armatimesh janë konfiskuar në veri të Kosovës, që dyshohet se kanë mbetur aty, pas sulmit të 24 shtatorit të vitit të kaluar në Banjskë të Zveçanit. Autoritetet e Kosovës njoftuan se policia e ka siguruar informacionin nga qytetarët dhe Agjencia e Kosovës për Inteligjencë (AKI). Drejtori i përgjithshëm i Policisë, Gazmend Hoxha dhe ministri i Brendshëm , Xhelal Sveçla, kanë bërë të ditur se bastisjet janë kryer në rrethinën e Zveçanit. Në mesin e pajisjeve të konfiskuara janë rreth 1.500 municione, 10 armë të gjata, 62 shok-bomba, eksplozivë, radio-lidhje, karikatorë të mbushur e të zbrazët, dhe një uniformë e ushtrisë serbe. Në lidhje me këtë situtë është ndaluar për tu marrë në pyetje një person, ish-zyrtar i Policisë së Kosovës, pasi dyshohet se është i lidhur me armët të cilat janë gjetur në afërsi të shtëpisë së tij. Prej sulmit të 24 shtatorit në Banjskë të Zveçanit, autoritetet kanë prezantuar disa herë armatim të konfiskuar në pjesën veriore. Në shtatorit të 2023-ës, një grup i armatosur serb e ka sulmuar Policinë e Kosovës në Banjskë, duke lënë të vrarë rreshterin Afrim Bunjaku.