Një ngjarje e rëndë ndodhi mbrëmjen e së enjtes në Greqi, ku pas një atentati mafioz mbeti i vrarë 32-vjeçari shqiptar Roan Brahimi. Ai ndodhej në makinë në rrugën Mesologjiu në Athinë së bashku me shtetasen Katerina Beqo 37-vjeç, që u shpëtoi mrekullisht plumbave. Çifti u qëllua nga një motoçikletë në të cilën ndodheshim dy persona të maskuar. Emri i Roan Brahimit është i njohur për drejtësinë shqiptare, pasi akuzohet si i përfshirë në atentatin ndaj Ylli Brahimit, ku mbeti i vrarë Klisman Preçi. I njohur si rival i Ervis Martinajt, më vitin 2021 Brahimi u shpall në kërkim nga policia, pasi së bashku me dy persona të tjerë shkaktuan terror në një lokal në Zejmen të Lezhës. Bashkë me Ramazan Rrajën dhe Alesio Dobrozi, ata u futën të armatosur me kallashnikov duke kërkuar pronarin. Ata kërcënuan dhe kryen kontrolle ndaj klientëve, për kartat e tyre të identitetit. Ai ka qenë në kërkim policor edhe për vrasjen e Brilant Martinajt më 17 korrik të vitit 2022. Po ashtu, Roan Brahimi rezulton i arrestuar edhe në vitin 2018 në Lezhë, ku iu sekuestruan municione, Euro dhe bizhuteri të dyshuara nga veprimtaria kriminale e vjedhjes. Ai figuronte me dy emra në Greqi, pasi njihej edhe si Sidorel Prendi. Sipas informacioneve paraprake, dyshohet se ekzekutimi është bërë për motive hakmarrjeje.