Në përfundim të procesit të numërimit të votave nga zgjedhjet parlamentare të 9 shkurtit, nisën akuzat mes partive politike për manipulim me vota. Rezultati nga numërimi i votave të diasporës me postë, ku Lidhja Demokratike e Kosovës mori 30.55% të tyre, bëri që Lëvizja Vetëvendosje ta akuzonte këtë parti për manipulim. Sipas anëtarit të Lëvizjes Vetëvendosje, Alim Ramës, rritja e votave të LDK-së është artificiale, pasi nga votimi i diasporës në përfaqësi diplomatike, kjo parti mori vetëm 7.30% të votave. Lëvizja Vetëvendosje thotë se manipulimi vërehet në mijëra fletëvotime ku ka votë për kandidatit për deputetë nga radhët e LDK-së, Hysen Çekajn dhe disa kandidatëve të tjerë. LVV pretendon se në këto fletëvotime ka një shabllon të votimit, pra që janë votuar deputetët e njëjtë dhe thotë se u kurdis nga një grup i organizuar për çka ka njoftuar edhe policinë dhe prokurorinë e shtetit.