Vëmendja botërore është zhvendosur në një konflikt të ri të armatosur. Prej mesnatës së kaluar Izraeli po sulmon me qindra avionë bombardues Republikën Islamike, duke vrarë të paktën 20 komandantë të lartë iranianë dhe 7 shkencëtarë bërthamorë. Fillimisht, forcat izraelite sulmuan bazat ushtarake dhe bërthamore në të paktën 8 qytete iraniane, ndërsa ushtria izraelite njoftoi se në orët e pasdites nisi një valë të re sulmesh, duke prekur edhe zonat e banuara në Teheran, ku deri më tani raportohet për dhjetëra të vrarë e qindra të plagosur, përfshirë dhe gra e fëmijë. Në sulmet e para, u eliminuan Komandanti i Përgjithshëm i Gardës Revolucionare Islamike, Hossein Salami; Komandanti i Shtabit Qendror të Khatam-al Anbiya, Gholamali Rashid; Shefi i Shtabit të Forcave të Armatosura të Iranit, Mohammad Bagheri, dhe dy shkencëtarët Fereydoon Abbasi dhe Mohammad Mahdi Tehranchi. Në sulmet e reja u vra edhe drejtuesi i Forcave Ajrore të Gardës, Amir Ali Hajizadeh.