Opozita do të bllokojë akset kryesore të rrugëve më 29 tetor. Ky është vendimi që u mor në mbledhjen e kryetarëve të degëve që zhvillua në selinë e PD të premten në mbrëmje. Mbledhjen e drejtoi Sekretari i Përgjithshëm Flamur Noka. Në fokus të diskutimeve ishte protesta e radhës e njoftuar më herët për në datën 29 tetor. Në mbledhje u vendos që protesta të nisë në orën 17:00. Drejtuesit e PD-së në qarqe janë zotuar të organizojnë qytetarët në rang qarku për të organizuar atë që Berisha e quan 'mosbindje civile' përmes bllokimit të akseve kryesore në Shqipëri. Konkretisht akset që do të bllokohen janë rrethrrotullimi te “Kthesa e Kamzës”, aksi Milot- Shkozet, rrethrrotullimi Rrogozhinë, rrethrrotullimi Levan dhe rrethrrotullimi i Bradasheshit. Kujtojmë se ishte kryetari i opozitës, Sali Berisha, që pak ditë më parë bëri me dije se mosbindja civile sipas tij do të vazhdojë në 29 tetor dhe do të shtrihet në gjithë vendin. Ai kërkoi angazhim nga kryetarët e degëve, duke paralajmëruar që do të ketë paralizim të qarkullimit rrugor në akset kyçe në vend.