Yeva Vorona, mikesha e dy 21-vjeçareve që ndërruan jetën në Tiranë, ka dëshmuar se para tragjedisë, kanë qëndruar të trija bashkë dhe kanë konsumuar alkool, por të dy rejat bashkë me alkoolin kanë marrë edhe medikamente qetësuese. Sipas saj, njëra prej tyre vuante nga zemra, dhe tjetra nga epilepsia. Ajo ka treguar se kur është zgjuar nga gjumi i ka gjetur të dyja shoqet pa jetë, dhe më pas ka njoftuar policinë. “Antonian dhe Anastasian i kam shoqe. Erdhën në Shqipëri për pushime. Në mbrëmje nisëm të pimë alkool të trija. Vajzat kanë pirë edhe qetësues metadol dhe një medikament tjetër në formë tretësire që nuk e di çfarë ishte”, është dëshmia e saj. Antonina Kozachenko dhe Anastasia Lopukhova, që u gjetën të vdekura të premte në një apartament në zonën e “Selvisë’, dyshohet se punonin si punonjëse seksi. Megjithatë, pritet hetimi i plote dhe ekspertiza mjeko-ligjore për zbardhjen e ngjarjes.