Banorë të zonës së ish-kënetës, njohur ndryshe si Durrësi i Ri, të cilët janë përmbytur dy herë brenda këtij viti, më 29 janar dhe më 11 shtator, kanë protestuar pasditen e së enjtes. Ata i kërkojnë bashkisë Durrës ndërhyrje urgjente dhe një zgjidhje afatgjatë për problemin e tyre të përsëritur. Përmes një peticioni të nënshkruar nga afro 800 banorë, ata i drejtohen pushtetit vendor me kërkesa konkrete, duke theksuar se dimri që po afron dhe ndryshimet e papritura të motit nuk duhet të sjellin të tjera katastrofa në banesat dhe bizneset e tyre. Përveç masave parandaluese, ndërhyrjeve në infrastrukturë dhe mirëmbajtjes së vazhdueshme, banorët kërkojnë gjithashtu dhe mbështetjen e premtuar financiare për familjet që u dëmtuan nga dy përmbytjet e këtij viti.