Ka përfunduar protesta në Zubin Potok dhe Zveçan, pas një dite të mbushur me tensione dhe raste dhune ndaj KFOR-it. Në veriun e Kosovës, përkatësisht Zubin Potok, ata qëndruan para objektit të Komunës për orë të tëra, por nuk u konstatuan raste të serbëve që mbanin maska, ndërsa në mesin e tyre pati edhe fëmijë. Sipas Kosovapress ajo që ra në sy ishte edhe fakti se protestuesve iu soll ushqim në mënyrë të organizuar. Ndërkaq, në fund të ditës një protestues i dehur ka tentuar t’i afrohet Policisë së Kosovës, por i njëjti u largua nga qytetarët e tjerë serbë. Protesta e sotme në Zveçan është përcjellë me tensione ku ka pasur provokime nga protestuesit në drejtim të KFOR-it. Serbët kanë provokuar vazhdimisht, ndërkohë penguan edhe punën e gazetarëve gjatë raportimit. Prej 3 ditësh serbët vijojnë protestat në komunat veriore, të cilët po kundërshtojnë kryetarët e zgjedhur shqiptarë në zgjedhjet e mbajtura më 23 prill. Të hënën, protestuesit me maska edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve.