Mediat italiane kanë publikuar sot detaje të reja nga aksioni i Prokurorisë së Posaçme dhe Antimafias atje, kundër një grupi kriminal italo-shqiptar që pastronte para përmes një rrjeti restorantesh në Firence të Italisë. Pikërisht atje janë kryer sot 23 kontrolle, ndërsa sipas një njoftimit të spak edhe në vendin tonë, në Tiranë, Vlorë, Durrës dhe Elbasan janë kryer kontrolle për anëtarë të këtij grupi. Mediat italiane thonë se anëtarët e grupit kishin blerë 23 restorante, bare, pastiçeri, por edhe makina luksoze, bizhuteri dhe diamante. Anëtarëve të këtij grupi që drejtohej në shqiptari Eulert Kamani dhe italiani Alessandro Bigi, president prej disa muajsh i klubit të futbollit Iskia, ju janë sekuestruar 400 mijë euro të shpërndara në banesa, zyra, kasaforta sigure por edhe në banka. Këtyre personave iu janë sekuestruar edhe kompjutera, telefona që do të ekzaminohen nga hetuesit, të cilët i akuzojnë se kanë mundur të pastrojnë 13.5 milionë euro për 12 vite. Organizata ka blerë e marrë me qira kryesisht restorante e bare në zonën historike të qytetit, përmes të cilave nuk lëshonin fatura, duke shmangur taksat si dhe paguanin në të zezë punëtorët. Të dy sipërmarrësit thonë hetuesit, Kamani dhe Bigi kur nisën biznesin e sipërmarrjeve nuk kishin burime finacaire. Në 2014 ata deklaronin vetëm nga 20 mijë euro të ardhura, ndërsa në dekadën pasuese ata mundën të blejnë një perandori të tërë me restorante dhe bare, por edhe 50% të aksioneve të klubit sportiv të Iskias.