Pas presidentit Donald Trump, Kosova ka marrë urimet më të mirë për ditën e Pavarësisë edhe nga kreu i diplomacisë amerikane Marco Rubio, i cili ka përcjell në faqen zyrtare të DASH një mesazh mjaft të ngrohtë për shtetin më të ri të Europës. “Në emër të Shteteve të Bashkuara të Amerikës, jdua të përcjell urimet e mia me rastin e 17 vjetorit të shpalljes së pavarësisë së Kosovës – një rast ky për të reflektuar mbi qëndrueshmërinë, vendosmërinë dhe aspiratat e popullit të Kosovës. Shtetet e Bashkuara e kanë mbështetur me krenari rrugëtimin e Kosovës drejt kthimit në një vend sovran, demokratik, multietnik dhe të begatë. Paqja rajonale, siguria dhe zhvillimi ekonomik mbeten thelbësore për zhvillimin e qëndrueshëm të saj. Ndërsa ju festoni pavarësinë tuaj, ne nderojmë miqësinë dhe vlerat e përbashkëta mes njerëzve tanë”, është mesazhi i kryediplomatit amerikan. Shefi i Shtëpisë së Bardhë, Trump e përcolli një ditë më parë mesazhin e tij inkurajues, ku tregonte se mbështetja e SHBA-së për Kosovën do të mbetet e palëkundur. Në urimin e nisur presidentes Vjosa Osmani, Trumpi nënvizonte se Ëashingtoni do të vazhdojë të punojë me Kosovën, ndërsa ajo forcon institucionet demokratike dhe promovon rritjen ekonomike përmes një mjedisi të qëndrueshëm dhe të drejtë biznesi, ndërsa nënvizonte se lidhjet midis popujve të të dyja vendeve janë të forta dhe se pret zgjerimin e tyre, përfshirë rritjen e mundësive për investime, për të sjellë mirëqenie më të madhe për të dy vendet.