Festa e Pashkëve duhet të mbahej në paqe pasi vetë moska shpalli armëpushim me Ukrainën, por referuar deklaratës së presidentit ukrainas Volodymyr Zelensky armëpushimi nuk u zbatua. Zelensky akuzoi për bombardime dhe luftime të vazhdueshme nga pala ruse. Forcat e armatosura të Ukrainës raportuan për 59 goditje me granata nga pala ruse si dhe për pesë tentativa për sulme përgjatë vijës së frontit. "Ne e dimë shumë mirë se si manipulon Moska dhe jemi të përgatitur për çdo gjë. Çdo goditjeje ruse do t'i përgjigjemi në mënyrë të përshtatshme. Në disa zona situata është qetësuar", tha ai. Presidenti ukrainas deklaroi njëkohësisht se Ukraina ishte e gatshme të respektonte dhe zgjaste armëpushimin."Nëse Rusia është e gatshme të angazhohet vërtet për një heshtje të plotë dhe të pakushtëzuar të armëve, Ukraina do të veprojë në përputhje me rrethanat. Propozoj 30 ditë paqe”. Nga ana tjetër edhe Rusia kaloi në kundër akuza duke e akuzuar Ukrainën për shkeljen e armëpushimit. Sipas ministrisë ruse të Mbrojtjes, ushtria ukrainase ka vijuar sulmet në rajonin Donetskut. "Si rezultat ka të vdekur dhe të lënduar në radhët e popullatës civile dhe dëmtime të ndërtesave civile," thuhet në një deklaratë të ministrisë. Megjithatë informacioni i dhënë nga palët ndërluftuese nuk mund të verifikohet në mënyrë të pavarur.