Këto janë festimet e banorëve në Gaza pas marrëveshjes së paqes mes Izraelit dhe Hamasit. Pas 15 muajsh konflikt me mbi 46 mijë viktima, akordi për paqe u arrit mbrëmjen e së mërkurës ndërsa qeveria e Izraelit do të votojë formalisht për marrëveshjen ditën e enjte. President izraelit, Isaac Herzog, deklaroi se marrëveshja për paqen do t’i japë fund shumë vuajtjeve dhe falënderoi kreun e shtëpisë së Bardhë, Joe Biden për punën e bërë. Marrëveshja do të hyjë në fuqi të dielën, më 19 janar. Faza e parë e marrëveshjes do të zgjasë për 42 ditë dhe do të përfshijë armëpushimin dhe tërheqjen e forcave të Izraelit nga zonat e populluara. Si pjesë e marrëveshjes, Hamasi do t’i lirojë 33 pengje izraelite. Në kthim, Izraeli do të lirojë një numër të burgosurish që po mbahen në burgjet e Izraelit. Gjithashtu, marrëveshja parashikon edhe futjen e 600 kamionëve me ndihma humanitare çdo ditë në Gazë, 50 prej të cilëve me karburant, ndërkohë që gjysma e tyre do të dërgohen në pjesën veriore të Gazës. Faza e dytë do të lejojë lirimin e të gjitha pengjeve të mbetura, përfshirë ushtarët. Po ashtu, në këtë fazë, sipas presidentit Joe Biden, parashihet që të gjitha forcat izraelite të tërhiqen nga Gaza dhe që armëpushimi i përkohshëm të bëhet i përhershëm. “Sot, pas shumë muajsh diplomacie nga SHBA-ja bashkë me Egjiptin dhe Katarin, Izraeli dhe Hamasi kanë arritur marrëveshje për armëpushim dhe pengje”, theksoi ai. Një plan i madh rindërtimi për Gazën do të fillojë në fazën e tretë, ka thënë presidenti në largim i SHBA. “Rruga për këtë marrëveshje nuk ka qenë e lehtë. Këto ishin nga negociatat më të vështira që kam përjetuar ndonjëherë”, ka theksuar Biden. Kur Biden është pyetur se sa ka merita administrata në ardhje e Trumpit për këtë marrëveshje ai tha “Kemi vepruar si një skuadër, por ama kjo është korniza e marrëveshjes që pata propozuar në maj. Është saktësisht kjo”.