Një tërmet i fortë me magnitudë 6.0 është regjistruar mbrëmjen e së hënës në Turqi, me epiqendër rreth 8 kilometra nga Sindirgi dhe 59 kilometra nga Balikesiri, kryeqyteti rajonal. Sipas të dhënave të Institutit Kombëtar të Gjeofizikës, lëkundjet u shënuan në një thellësi prej 10 kilometrash. Deri më tani nuk ka raportime për viktima, por autoritetet turke kanë nisur menjëherë verifikimet në terren. Ministri i Brendshëm, Ali Yerlikaya, tha se pas tërmetit “të gjitha ekipet nga institucionet përkatëse filluan menjëherë punën në terren”. Pamje të publikuara nga agjenci lajmesh lokale tregojnë shembjen e disa ndërtesave në Sindirgi. Ekipet e kërkim-shpëtimit po kontrollojnë zonat e prekura, ndërsa banorët janë udhëzuar të qëndrojnë larg ndërtesave të dëmtuara. Ky është tërmeti i dytë i rëndë që godet këtë rajon brenda këtij viti. Në gusht, një tjetër tërmet me të njëjtën magnitudë la një të vdekur dhe 29 të plagosur. Turqia është një nga vendet më të ekspozuara ndaj rrezikut sizmik, pasi shtrihet mbi disa vija të fuqishme tërmetesh. Kujtojmë se në shkurt 2023, një tërmet shkatërrimtar në juglindje të vendit shkaktoi më shumë se 53 mijë viktima.