Ministri gjerman i shëndëtesisë Jens Spahn dha alarmin nga ajo që e quajti “pandemi masive e të pavaksinuarve” dhe bëri thirrje për masa më të ashpra për të ndalur hovin e rasteve të reja të Covid 19. “Kujdesi i shërbimit intensiv është sërish nën një trysni shumë të madhe në disa rajone të Gjermanisë”, tha Spahn. Vendi më i populluar i Europës me rreth 83 milionë banorë është gjendur këto javët e fundit përballë nje shtimi të ndjeshëm të infektimeve, të cilin autoritetet shëndetësore e kanë përshkruar praktikisht si “valën e katërt të sëmundjes”. Mbi 20 mijë raste të reja dhe 194 vdekje u regjistruan gjatë 24 orëve të fundit. Më shumë se 66 për qind e popullsisë është plotësisht e vaksinuar, por ministri Spahn shprehu zhgënjimin që procesi i vaksinimit është ngadalësuar dhe një numër i konsiderueshëm personash të moshave nga 18 deri në 59 vjeç mbeten të pavaksinuar. Kancelarja ne detyrë, Angela Merkel u shpreh në favor të kufizimeve për të pavaksinuarit, ndonese ishte kundër një karantine të përgjithshme. Shoqatat e mjekëve janë të mendimit se koronavirusi nuk do të zhduket, por do të bëhet pjesë e jetës tonë ashtu si gripi.