Dhjetëra refugjatë ukrainas, shumica e të cilëve fëmijë, e kaluan natën duke fjetur në rrugë në Hungari, pasi Qeveria hungareze vendosi të mos paguajë më për strehimin e tyre. Refugjatët u dëbuan në rrugë, për shkak të një dekreti të nënshkruar nga kryeministri nacionalist Viktor Orban, i cili hyri në fuqi më 21 gusht. Dekreti e kufizon mbështetjen e shtetit për refugjatët që kanë shkuar në Hungari nga pjesë të Ukrainës, për të cilat Budapesti zyrtar thotë se nuk janë të prekura nga pushimi i plotë dhe nga lufta që ka nxitur Rusia. Që nga koha u zhvendosën në Hungari, refugjatët filluan të integrohen duke i dërguar fëmijët e tyre në shkollë dhe duke punuar. Megjithatë, pa ndihmë shtetërore për strehim, ata nuk mund të paguajnë një vend për të jetuar. Sipas Qeverisë hungareze, 13 rajone në Ukrainë aktualisht pranohen zyrtarisht si të prekura drejtpërdrejt nga lufta, ndërsa në shumë pjesë të tjera mund të punohet dhe jetohet duke kontribuar kështu edhe për atdheun.