Bashkimi Evropian ka paralajmëruar se gjatë kësaj jave do të zbulojë masat ndëshkuese ndaj Kosovës, të cilat janë përgatitur për shkak të mungesës së hapave për përmirësimin e situatës në veri. Ky lajm u raportua nga drejtori i përgjithshëm për zgjerim i Komisionit Evropian, Jan Koopman, pasi mori pjesë në debatin në Komisionin për politikë të jashtme të Parlamentit Evropian, së bashku me të dërguarin evropian për dialogun Kosovë-Serbi, Mirosllav Lajçak. Koopman tha se po përgatiten një sërë masash ndaj Kosovës, teksa përmendi pezullimin e punës të të gjitha grupeve për Marrëveshjen e Stabilizim Asociimit (MSA), pezullimin e financimit të programeve të BE-së, mosmiratimin e projekteve nga Fondi për investim në Ballkanin Perëndimor si dhe pezullimin e takimeve në nivele politike. Ndër të tjera shtoi se këto masa “nuk janë marrë me lehtësi” dhe se ato janë të kthyeshme në rast se merren hapat e duhur drejt shtensionimit të situatës.