Ka thyer heshtjen nëna e tre fëmijëve, Blerina Basha, e cila që nga mbrëmja e së dielës, së bashku me fëmijët, ndodhet në Pediatrinë e Spitalit të Durrësit, pas rastit të rëndë që u denoncua me video nga ish-vjehrra dhe solli ndërhyrjen e institucioneve. Në pamundësi për të dalë jashtë spitalit, pasi përveç keqtrajtimit mund ta akuzojnë dhe për "braktisje" të fëmijëve, ajo rrëfen se e mban familjen e vetme, duke punuar me orar të zgjatur, pa asnjë mbështetje familjare dhe se kurrë nuk i ka braktisur fëmijët e saj. E divorcuar prej 5 vitesh, vitin e kaluar ish-bashkëshorti i propozoi të bashkoheshin për të shkuar në Itali, por nuk funksionoi dhe u kthye në Durrës. Mori një shtëpi me qera dhe i regjistroi fëmijët në shkollë. Vështirësitë u shtuan, pasi mungesat në shkollë dhe gjendja shëndetësore e fëmijëve e vunë nën presion, ndërsa kërkesat për ndihmë, sipas saj, mbetën pa përgjigje.