Ka nisur, ashtu sic ishte paralajmëruar, në parlamentin maqedonas debati mbi miratimin e dokumentit të njohur si “propozimi francez”, i cili synon të zgjidhë ngërcit e krijuar mes Sofjes dhe Shkupit, të ngecur prej kohës në mosmarrëveshje mbi çështjen e gjuhës, identitetit dhe të së kaluarës historike, përplasje këto që kanë bllokuar integrimin e mëtejshëm e Maqedonisë së Veriut në Bashkimin Europian, e të Shqipërisë bashkë me të. Propozimi 7 pikësh i Francës paarashikon lëshime nga të dyja palët. Kërkesa më delikate për palën maqedonase është ndryshimi i Kushtetutës, në mënyrë që të njihet pakica bullgare si komb i barabartë me të tjerët. Qeveria maqedonase e mbështet propozimi, por opozita jo. Me idenë se ai parashikon një “bullgarizim të vendit”, ajo ka organizuar prej ditësh protesta që kanë marrë edhe kthesë të dhunshme. Një numër i madh protestuesish janë mbledhur edhe sot përpara godinës me flamuj maqedonas e pankarta në duar, ndërkohë që brenda ligjvënësit vazhdojnë diskutimet.