Lufta në Lindjen e Mesme ndërmjet Izraelit dhe Hamasit arriti ditën e 209. Kryeministri izraelit Benjamin Netanyahu i ka thënë Sekretarit të Shtetit të SHBA-ve Antony Blinken se nuk do të pranojë një marrëveshje me Hamasin që përfshin fundin e luftës. Izraeli, ndërkohë, ka rihapur pikëkalimin Erez me veriun e Rripit të Gazës rreth 7 muaj pas shkatërrimit të tij në sulmin e 7 tetorit, një veprim ky i kërkuar nga SHBA për të sjellë më shumë ndihma në enklavën palestineze. Ndërkaq Turqia paralajmëroi padi në gjykatën ndërkombëtare për gjenocid kundër Izraelit. Ministri i Jashtëm turk Hakan Fidan tha: “Ne si Turqi kemi vendosur të marrim pjesë në procesin për gjenocid të paraqitur nga Afrika e Jugut kundër Izraelit në Gjykatën Ndërkombëtare të Drejtësisë në Hagë. Nëse disa kanë vendosur të sillen si spektatorë, ne nuk do të pajtohemi kurrë me atë që po ndodh”. Kolumbia gjithashtu ka prishur marrëdhëniet diplomatike me Izraelin. Këtë e ka bërë të ditur të mërkurën presidenti Gustavo Petro, i cili e cilësoi të papranueshme dhe tejkalim të çdo kufiri atë që po ndodh në Gaza. Pamjet: AFP