Zyra e Kryeministrit izraelit Benjamin Netanyahu konfirmoi se rezidenca private e tij u sulmua me dronë të nisur nga Libani. Në një deklaratë të shkurtër të saj sqarohet se Netanyahu dhe gruaja e tij Sara nuk ishin në shtëpi në momentin e sulmit dhe se nuk kishte të lënduar në incident. Dy drone të tjerë të lëshuar në të njëjtën kohë u rrëzuan nga mbrojtja ajrore, duke nxitur sirenat në të gjithë në zonën e Tel Avivit. Episod që e ushqen konfliktin edhe më shumë vjen pak pasi presidenti amerikan Joe Biden deklaroi se arritja e një armëpushimi mund të jetë më e lehtë në Liban sesa në Gaza. Që kur ka nisur lufta në territorin palestinez pas sulmit të Hamasit 7 tetorin e vitit të kaluar, Izraeli dhe Hezbollahu kanë këmbyer vazhdimisht zjarr në kufi. Por, së fundi luftimet janë përshkallëzuar dhe Izraeli në fillim të tetorit nisi një ofensivë tokësore në jug të Libanit. Izraeli ka thënë se synon që të dëbojë Hezbollahun nga kufiri, në mënyrë që mijëra izraelitë, të zhvendosur nga luftimet, të mund të kthehen në shtëpitë e tyre. Që nga tetori 2023, sipas Ministrisë së Shëndetësisë në Liban kanë vdekur mbi 2,309 persona dhe janë plagosur thuajse 11 mijë të tjerë.