Udhëheqësit më të lartë të kishave në Jerusalem hynë të premten në Gazë në një vizitë të rrallë solidariteti, një ditë pasi një predhë izraelite goditi kishën e vetme katolike atje, duke vrarë tre persona. Sulmi është dënuar nga shumë udhëheqës botërorë dhe figura fetare. Ndërkaq, kryeministri izraelit Benjamin Netanyahu zhvilloi pasditen e së premtes një bisedë telefonike me Papën Leone e 14-të, të cilit i bëri një ftesë zyrtare për të vizituar Izraelin. Lajmi u bë i ditur nga media izraelite, duke cituar burime zyrtare që e përshkruajnë komunikimin si të ngrohtë dhe të fokusuar në çështje humanitare dhe të sigurisë. Mësohet gjithashtu se Netanyahu e ka informuar Atin e Shenjtë për zhvillimet e fundit rreth negociatave për lirimin e pengjeve që mbahen ende në Rripin e Gazës. “Jemi pranë një marrëveshjeje,” citohet të ketë thënë ai, duke nënvizuar se bisedimet me ndërmjetësit ndërkombëtarë janë në një fazë të avancuar dhe se shpejti mund të ketë një marrëveshje. Përkundër tensioneve në rritje, përpjekjet për të ndihmuar civilët vazhdojnë. Patriarku latin i Jerusalemit, kardinali Pierbattista Pizzaballa (Picabala), në bashkëpunim me patriarkun greko-ortodoks Teofili III, po udhëheqin një operacion humanitar që përfshin shpërndarjen e rreth 500 tonëve ndihma për banorët e Gazës. Aksioni është përshëndetur nga organizata ndërkombëtare si një shenjë uniteti dhe bashkëpunimi në një kohë krizash