Një barazim 2-2 dhe tensione në fushë e në tribuna. Ka qenë kjo pasqyra e ndeshjes miqësore të futbollit mes Elbasanit dhe Pogradecit e luajtur në Elbasan Arena mbrëmjen e së shtunës. Pavarësisht natyrës miqësore të ndeshjes, tensionet u rritën në minutat e fundit duke përfshirë jo vetëm futbollistët në fushë, por edhe tifozët në tribuna. Shkak për përplasjet u bë sjellja provokuese e njërit prej lojtarëve të Pogradecit, i cili me gjeste dhe fjalë u përpoq të provokonte kundërshtarët në disa raste gjatë ndeshjes. Kjo çoi në reagime të ashpra duke kulmuar me momente tensioni si në fushë, ashtu edhe në tribuna, ku pati shkëmbime fjalësh , përplasje fizike dhe ndërhyrje nga stafet respektive për të qetësuar situatën. Në këtë miqësore për verdh e blutë shënuan në minutën e 44 me Loukili dhe në minutën e 74 shënoi Dialo , ndërsa për Pogradecin në minutën e 53 Panajos dhe Rodrigues në minutën e 69.