Gjykata e Lartë ka ndryshuar relatorin për shqyrtimin e rekursit të ish-deputetit demokrat, Ervin Salianji, për dënimin e tij me 1 vit burg. Fillimisht, Gjykata e Lartë ka shpallur relatore gjyqtaren Albana Boksi, por më pas çështjen ja ka kaluar gjyqtarit Sokol Binaj. Duke e cilësuar këtë lëvizje një skandal të Gjykatës së Lartë, ish-deputeti demokrat, Ervin Salianji, denoncon nga qelia e Burgut të Fierit, se po manipulohet qëllimisht shorti, në mënyrë që të pengohet pjesëmarrja e tij në zgjedhjet e 11 majit. “Duhet të mbahem në burg, të mos lejohem të merrem me politikë, të bëj fushatë, të kandidoj! Ndryshimi apo manipulimi i shortit bëhet për të vonuar shqyrtimin dhe vendimmarrjen dhe po ashtu për të mbajtur nën presion gjyqtarët duke krijuar dy trupa. Një trupë që do të shqyrtojë çështjen, dhe një si siguresë për nevojën e qeverisë! Kjo është autokracia në veprim, ky është pushteti i sunduesit. Ky është regjimi!” Ndërkohë, Gjykata e Lartë ka pranuar se është ndryshuar relatori, duke sqaruar se çështja i ka kaluar gjyqtarit Binaj, pasi ai ka shqyrtuar më parë kërkesën për pezullimin e ekzekutimit të vendimit. “Për të respektuar përputhshmërinë me praktikën që është ndjekur në të gjitha rastet e kësaj natyre, është kryer kalimi i çështjes për shqyrtimin e rekursit tek gjyqtari Sokol Binaj, i cili është gjyqtari që ka shqyrtuar më parë kërkesën për pezullim të ekzekutimit të vendimit”. Ish-deputeti Ervin Salianji e cilëson gjithë procesin ndaj tij si politik, ndërsa paralajmëron se do të mbajnë përgjegjësi ata që e çuan pas hekurave.