Bashkimi Evropian ka shpallur se më 12 tetor 2025 do të nisë zbatimi i sistemit të ri të kontrollit kufitar për qytetarët nga vendet jo-anëtare të BE-së. Ky sistem, i njohur si Sistemi i Hyrje/Daljes, do të zëvendësojë vendosjen e vulave në pasaporta dhe do të aplikohet në kufijtë e jashtëm të 29 vendeve evropiane. Fillimisht i planifikuar për nëntor 2023, EES është shtyrë disa herë për shkak të mungesës së përgatitjes në disa shtete. Komisioni Evropian njoftoi se sistemi do të implementohet në mënyrë graduale për gjashtë muaj, për t’i dhënë kohë autoriteteve, pasagjerëve dhe sektorit të transportit që të përshtaten me procedurat e reja. EES do të zbatohet në rreth 60 vende, përfshirë ato të Ballkanit Perëndimor, si edhe në Zvicër, Norvegji, Islandë dhe Lihtenshtajn, të cilat janë pjesë e zonës Schengen. Sistemi do të regjistrojë datat e hyrjes dhe daljes së vizitorëve, si dhe të dhëna për qëndrimet e tejzgjatura dhe hyrjet e refuzuara. Ai do të mbledhë të dhëna personale dhe biometrike, përfshirë fotografitë e fytyrës dhe gjurmët e gishtërinjve. Pasaportat e vendeve të Ballkanit Perëndimor tashmë janë biometrike dhe të harmonizuara me standardet e BE-së, duke përmbushur kushtet për lëvizje pa viza në zonën Schengen. Zyrtarët kanë paralajmëruar se mund të ketë radhë dhe vonesa në kufi, veçanërisht në pikat kufitare tokësore, në aeroporte dhe porte. Prandaj, është parashikuar që gjysma e pikave kufitare të nisin punën me sistemin brenda tre muajve, ndërsa funksionaliteti i plotë do të arrihet pas gjashtë muajsh. Komisioni Evropian ka premtuar fushata informuese për udhëtarët në të gjitha pikat kufitare dhe aeroportet e BE-së para nisjes së sistemit.