Debati i dy muajve më parë për numrin e shqiptarëve në burgjet angleze mes kryeministrit Edi Rama dhe udhëheqësit të Reform UK, Nigel Farage, duket se është shuar për momentin. Ambasadori i Shqipërisë në Mbretërinë e Bashkuar, Uran Ferizi, është takuar me Nigel Farage për t’i thënë se kreu i Reform UK po përsëriste informacione të rreme, duke pretenduar se një në 50 shqiptarë në Britani ndodhej në burg. Takimi iu konfirmua Top Channel nga vetë ambasadori Uran Ferizi, i cili tha se pati një bisedë informale në zyrën e Farage, ku i tha: "Është krejtësisht e pavërtetë, dhe megjithatë po përsëritet në GB News dhe nga politikanët tuaj,” tha Uran Ferizi, ambasadori, i cili po merr pjesë në konferencën e Reform UK. “E ndërmora këtë veprim,” thotë më tej ambasadori Ferizi, “sepse po shtrembërohen statistikat zyrtare, të cilat merren dhe përdoren për të nxjerrë pretendime krejtësisht të ndryshme, që nuk i afrohen realitetit.” Siç edhe Top Channel raportoi disa javë më parë, të dhënat nga ambasada shqiptare në Londër kanë kundërshtuar raportimet se numri i shqiptarëve në Britani është 53,000, shifër e përdorur si burim për pretendimin “një në 50”. Ambasadori Ferizi për këtë tha se gjatë takimit me Farage i tha se "ishte thellësisht e padrejtë të shpërndaheshin këto, që në thelb janë gënjeshtra. Ato thjesht nuk janë të vërteta". Përceptimi i tij, thotë më tej ambasadori Uran Ferizi, ishte se Nigel Farage tregoi mirëkuptim kur i dëgjoi këto dhe ishte i gatshëm për t’i rishikuar statistikat. “Gjithashtu, theksova se shqiptarët janë një shembull i shkëlqyer i njerëzve që integrohen mirë në Britani. Ata punojnë shumë, mësojnë gjuhën, zakonet dhe rregullat e vendit. I thashë se ishte thellësisht e padrejtë për një vend që krenohet me ndershmërinë e vet, dhe ai duket se e vlerësoi këtë,” ka thënë ambasadori Ferizi në takimin me babain e Brexit, Nigel Farage, i cili vijon të ketë një ftesë të hapur prej Edi Ramës për të vizituar Shqipërinë. Ftesë kjo e cila është mirëpritur prej politikanit kontravers, të cilin sondazhet e nxjerrin shumë pikë larg opozitës Konservatore dhe me probabilitet të lartë për të qenë kryeministri i ardhshëm në Angli.