Miliarderi i teknologjisë, Elon Musk, dikur aleati i Donald Trump, i cili më vonë u përfshi në një përplasje publike me presidentin amerikan, ka përsëritur thirrjen e tij për të sfiduar atë që ai e përshkroi si sistem “unipartiak” në SHBA. “Dita e Pavarësisë është koha e përkryer për të pyetur nëse dëshironi pavarësi nga sistemi dypartiak (disa do të thoshin unipartiak)”, shkroi Musk në platformën sociale X, duke pyetur “A duhet të krijojmë Partinë Amerikane”. Ideja e Musk për krijimin e një partie të re erdhi pas një periudhe grindjesh publike dhe deklaratave të forta në rrjete sociale me presidentin amerikan, Donald Trump, në lidhje me projektligjin “OneBigBeautifulBill“ – tashmë të miratuar nga Dhomat e Kongresit. OneBigBeautifulBill është një paketë legjislative që përfshin një përzierje uljesh të taksave individuale dhe atyre të bizneseve, shpenzime masive për kontrollet e imigracionit, rritje të shpenzimeve ushtarake dhe një rritje të stimujve për karburantet fosile. Gjithashtu ka ndryshime në të drejtën për t'u përfshirë në programet shëndetësore dhe sociale, si dhe mbyllje të disa prej nismave të tranzicionit klimatik të iniciuara nga ish-Presidenti Joe Biden. Një shumë prej 178 miliardë dollarësh (rreth 150 miliardë euro) do të shkojnë për programe që synojnë të kufizojnë emigracionin, ndër të cilat bëjnë pjesë rifillimi i ndërtimit të murit kufitar me Meksikën, shtimi i personelit dhe i burimeve të policisë kufitare, hetimi dhe përndjekja penale e emigrantëve. Rreth 153 miliardë dollarë do të shpenzohen për mbrojtjen: ndërtim anijesh, sisteme për mbrojtjen nga raketat, armë bërthamore dhe mbështetje për ndihmën ushtarake në kufi. Projektligji do të stimulojë si eksplorimin e burimeve dhe eksportet e gazit, dhe do t'u jepë fund koncesioneve dhe stimujve për automjetet elektrike, energjinë e pastër dhe programet e reduktimit të emetimeve. Gjithashtu do të ketë ulje taksash prej rreth 4.5 trilionë dollarësh (3.8 trilionë euro) për individët dhe bizneset.