Një tjetër artist i mirënjohur si Muharrem Hoxha, i vlerësuar për kontributin e tij në art si “Njeriu i shekullit”, heq kapelen përballë një ikone si Mirush Kabashi duke u shprehur se me humbjen e tij, “Nderi i Kombit”, sot është dhimbja e kombit. Sipas Hoxhës, Mirush Kabashi ishte shkollë më vete, dhe “qen i punës” pasi kishte disiplinë në punë. “Shumë faleminderit për respektin që tregoni për artistët sepse edhe ju jeni artistë vetë në zanatin tuaj.Të them të drejtën, po ikën plejada e aktorëve. Aktorët më të mirë them unë, si Nikolin Gjoja dhe Vangjel Heba, dhe pas këtyre Mirush Kabashi. Tani secili ka vendin e vetë, por unë njëherë kam punuar me Mirushin dhe ai ishte shkollë më vete. Qen i punës i themi ne. I përpiktë. Kam bërë një komedi me Mirushin, “Dy vëllezër e gjysmë” të Gjergj Vlashit, por kishte lezet. Nur kishte, pastaj ato recitime që kishte Mirushi… Me gjithë mend kollos i artit”- përfundoi artisti i mirënjohur Muharrem Hoxha.