Tekniku i Serbisë, Dragan Stojkoviç foli përpara ndeshjes me Shqipërinë në “Arenën Kombëtare”, mbrëmjen e 7 qershorit. Trajneri serb nuk preferoi të ndalej te marrëdhënia mes dy vendeve, duke u “kapur” dhe me një gazetar serb që e pyeti për këtë gjë, teksa nuk i kurseu elozhet për ekipin kuqezi dhe trajnerin Sylvino. “Uroj festën e Bajramit për ata që e festojnë. Shqipëria është një ekip mjaft i mirë dhe e tregoi me kualifikimin në Europian. Ka lojtarë shumë të mirë dhe një trajner të shkëlqyer si Sylvinho. Duhet të jemi të kujdesshëm. Nuk duhet të bëjmë gabime, sepse lojtarët janë aq të mirë sa mund të përfitojnë ndaj tyre. E dimë që kemi përballë një ekip serioz dhe të përgatitur mirë, gjë që e treguan në kampionatin Europian. Ajo që i karakterizon është agresiviteti në fushë. Një ekip solid garues. Sa i përket rezultatit, nuk kalkuloj. Kemi ardhur për të fituar dhe do të bëjmë çmos për ta arritur. Nuk po mendoj fare për marrëdhëniet mes Shqipërisë dhe Serbisë. Nuk e di si mund ta bëni një pyetje të tillë. Pas stërvitjes së sotme dhe asaj të nesërmen do të vendos për formacionin. Nëse do të jetë çdo gjë në rregull dhe besoj që çdo gjë do të jetë në rregull, formacioni do të jetë ai që kam në mendje”, u shpreh tekniku Dragan Stojkoviç.