Pas një seance maratonë, kuvendi i Shqipërisë miratoi vetëm me votat e mazhorancës ligjin për faljen e gjobave të papaguara në zonat rurale dhe qytet, pasi arritën një nivel shumë të lartë, sidomos ato për ndërtimet pa leje. Gjithashtu me këtë ligj do të falen edhe penalitetet e vendosura ne kohën e pandemisë nga AKU, Inspektoriati shëndetësor Shtetëror dhe policia bashkiake. Falja do të nisë nga viti 2015, ndërsa deputeti i Partisë Socialiste Erion Braçe, u shpreh se ky ligj nuk është një amnisti. “Është një ligj i rëndësishëm, nuk është amnisti, sepse iu referuan faktit që është amnisti, madje nuk është as falje. Projektligji nuk fal gjë, por shfuqizon masat administrative nga 1 janari i vitit 2015 dhe deri më 30 nëntor 2024. Ka të bëjë me ligjet e paketës fiskale dhe me asnjë ligj tjetër të kësaj natyre” Ndërkohë, deputeti i partisë demokratike, Edmond Spaho, u shpreh se projektligji për faljen e gjobave u bë me procedurë të përshpejtuar vetëm për efekt elektoral. “Mënyra se si po e kaloni ligjin është në kundërshtim me rregulloren. Duhet shqyrtuar në Kuvend 2 javë pas depozitimit, ndërkohë që po bëhet me procedurë të përshpejtuar. Është një ligj propagandë që vjen pas 5-6 vite të ngjarjeve që përmendni, tërmeti dhe pandemia”