Këto pamje të një pune intensive tregojnë ritmet e shpejta me të cilat po përparon ndërtimi i aeroportit të Vlorës. Momentet nga një ditë pune në pistën e aeroportit të tretë ndërkombëtar në vendin tonë i ka ndarë kryeministri Edi Rama, për të treguar e për t’i qëndruar premtimit të tij se ky aeroport do të hapet vitin që vjen. Me një sipërfaqe prej 309 hektarësh dhe pistë prej 3.2 km, Aeroporti i Vlorës që po ndërtohet 10 km në veri të qytetit bregdetar, do të jetë më i madhi në vend dhe do të ketë edhe një terminal kargo. Në total pritet që për këtë projekt të harxhohen 104 milionë euro. Punimet në këtë fazë të tretë të ndërtimit janë përqendruar në ngritjen e godinave më të rëndësishme të këtij projekti madhor. Po ashtu është duke u punuar me ritëm të lartë edhe tek pista, rrugët lidhëse, terminali, qendra kontrollit dhe zjarrfikëset. Autoriteti i Aviacionit Civil ka parashikuar që në fazën e operimit ky aeroport të nisë me të paktën 1 milionë pasagjerë duke sjellë një impakt të rëndësishëm për zonën, në veçanti për industrinë e turizmit. Me hapjen e aeroportit në vitin 2025, siç thotë edhe kryeministrit Rama, por edhe të tunelit të Llogarasë, plazhet e jugut pritet të shndërrohen në një magnet për një numër gjithnjë e më të lartë turistësh.