Kryeministrja italiane Giorgia Meloni ka zhvilluar të dielën një takim dypalësh me Princin dhe Kryeministrin e Arabisë Saudite, Mohammed Bin Salman. Takimi u zhvillua në një zonë të shkretëtirës Al Ulla dhe në përfundim të tij u nënshkrua një deklaratë e përbashkët e bashkëpunimit strategjik. “Të gjithë jemi të vetëdijshëm se marrëdhënia mes sistemit financiar të Italisë dhe Arabisë Saudite ka shumë hapësirë për zhvillim. Kjo i shërben interesit tonë të përbashkët”, tha Meloni. “Vlera totale e marrëveshjeve të nënshkruara sot gjatë vizitës sime është rreth 10 miliardë dollarë. Janë marrëveshje me të cilat ndërtohen platforma, për të krijuar së bashku mundësi të reja”-shtoi kryeministrja italiane. Sipas Georgia Melonit, më në fund, “ka një ndryshim mes blerjes dhe shitjes dhe bashkëpunimit” dhe për këtë arsye “është e rëndësishme të jemi në dialog, duke diskutuar dallimet tona si dhe duke dëgjuar bashkëbiseduesin tonë”.