Kryeministrja italiane Giorgia Meloni priti të martën Presidentin francez Emmanuel Macron për një takim dypalësh që zgjati thuajse tre orë dhe u pasua nga një darkë pune. Ky takim shënon një moment kyç në marrëdhëniet midis Italisë dhe Francës, të cilat kohët e fundit janë karakterizuar nga tensione dhe keqkuptime. Mesazhi i përbashkët ishte i qartë: rinisja e dialogut për të ndërtuar “një Evropë më sovrane, më të fortë dhe më të begatë”. Në tryezën e diskutimeve u vendosën disa nga çështjet më urgjente për të dy vendet dhe për Bashkimin Europian në tërësi. Konkurrueshmëria ekonomike, mbrojtja dhe siguria, forcimi i lidhjeve transatlantike, si dhe lufta kundër imigracionit të parregullt ishin ndër temat kryesore. Takimi shërbeu gjithashtu si platformë për të trajtuar çështje ndërkombëtare me rëndësi të veçantë. Situata në Ukrainë pas bisedimeve të fundit në Stamboll me Federatën Ruse ishte një nga temat që u diskutua gjerësisht. Të dy liderët riafirmuan “mbështetjen e vazhdueshme dhe të palëkundur të Francës dhe Italisë për Ukrainën” dhe angazhimin për një “zgjidhje të drejtë dhe të qëndrueshme”. Në axhendë ishte gjithashtu kriza në Lindjen e Mesme, situata e pasigurt në Libi dhe rëndësia e një koordinimi më të ngushtë për të promovuar stabilitetin dhe sigurinë në rajonin e Mesdheut.