Kryeministrja italiane, Giorgia Meloni ka planifikuar të zhvillojë një vizitë në bregdetin e Vlorës sot me familjen e saj. Ajo ndërpreu pushimet e saj në një fermë në zonën e Puglia, pasi pranoi ftesën e kryeministrit Edi Rama. Sipas mediave italiane ajo do të shoqërohet nga bashkëshorti i saj Andrea Giambruno, vajza Ginevra dhe mundet edhe nga motra e saj Arianna me bashkëshortin Francesco Lollobrigida. Sipas Corriere.it, në agjendën e saj është edhe një vizitë në shtëpinë e Ramës, ndërsa ende nuk dihet se sa do të zgjasin pushimet në tokën shqiptare. Kujtojmë se pak ditë më parë, ‘prozhektorët’ e mediave italiane u kthyen nga kryeministri shqiptar, pas një meme-je, ku Rama krahasonte shqiptarët që iknin në Itali në vitin 1991, me turistët italianë që tashmë vijnë për pushime në Shqipëri. Prej muajsh Shqipëria po përballet me bum turistësh nga e gjithë bota, përfshi edhe italianët, të cilët tërhiqen nga vendet magjepsëse dhe çmimet e lira. Kujtojmë se edhe ish-kryeministri britanik, Tony Blair ndodhet në Shqipëri, ai mbërriti në Himarë me helikopter mbrëmjen e së dielës.