Referendum ii shtetësisë në Itali rezultoi një dështim e kjo për shkak të pjesëmarrjes. Në votime kërkohej të merrnin pjesë mbi 50% e zgjedhësve të regjistruar, por vetëm 30% e tyre u paraqitën në qendrat e votimit, cka bëri që nisma ligjore, të rrëzohet. Propozimi për referendum, i mbështetur nga Partia Demokratike e qendrës së majtë, synonte shkurtimin e kohës së kërkuar për marrjen e nënshtetësisë. Një banor në moshë madhore që nuk është nga Bashkimi Evropian, dhe që nuk ka lidhje martesore apo gjaku me Italinë, aktualisht duhet të jetojë në këtë shtet për 10 vjet para se të mund të aplikojë për shtetësi – një proces që më pas mund të zgjasë edhe disa vite të tjera. Një fitore në këtë referendum do ta kishte shkurtuar këtë afat në pesë vjet, duke e vënë Italinë në një linjë me Gjermaninë dhe Francën. Kryeministrja Meloni, partia e së cilës, Vëllezërit e Italisë, me prirje të djathtë ekstreme, ka prioritet luftën kundër emigracionit të parregullt, ishte “absolutisht kundër” kësaj ideje. Qeveria e Melonit sakaq, rezulton ta ketë rritur numrin e vizave të punës për emigrantët e rregullt. Shumë anëtarë të koalicionit të saj të djathtë i bënë thirrje qytetarëve të mos votojnë, në mënyrë që të mos arrihej pragu i nevojshëm për vlefshmërinë e votimit. Fleta e votimit përfshinte një pyetje për shtetësinë. Katër të tjera kishin të bënin me rritjen e mbrojtjes për punëtorët e pushuar nga puna, ata që gjenden në situata të pasigurta apo të përfshirë në aksidente në vendin e punës. Ekspertët thonë se opozita kishte dashur ta shfrytëzonte këtë moment për ta kthyer votimin praktikishit në një referendum kundër qeverisë.