Pedagogu i Universitetit të Prishtinës, Xhevat Krasniqi ka hodhur poshtë akuzat për ngacmimin seksual, që 27 studente kanë bërë ndaj tij. Sipas profesorit, vajzat vijnë gjatë verës me fustane të shkurtër, ndërsa në këmbë kanë të shkruar kopje për provimet. “I pyes sepse kanë shënime, në këtë kontekst”, ka thënë ai sipas mediave kosovare. Studentet kanë denoncuar Krasniqin për ngacmim seksual dhe gjatë protestave të vazhdueshme para Rektoratit dhe Këshillit të Etikës ku kanë kërkuar shkarkimin e tij, kanë cituar deklaratat e Krasniqit, kur u përmendte vajzave masazh, favorizme notash dhe i ftonte për kafe pas mësimit. Por, sipas pedagogut këto shprehje janë shtrembëruar. “Asnjëherë nuk i kam detyruar për gjë, janë akuza të mëdha kundër meje”, është shprehur ai. Ndërkohë, një ditë më parë, Këshilli i Etikës mori vendimin për pezullimin nga detyra të pedagogut të Universitetit të Prishtinës.