Disa foto të “Bayesian” para stuhisë mund të rihapin çështjen për jahtin luksoz që u mbyt në brigjet italiane. Pamjet tregojnë se dyert e jahtit të fundosur ishin mbyllur një çerek ore para tragjedisë. Nëse do të ishte kështu, hipoteza se gabimi njerëzor shkaktoi katastrofën do të hidhej poshtë. Këto foto të shpërndara nga disa media ndërkombëtare përbëjnë një risi e rëndësishme për rindërtimin e fatkeqësisë që i shton edhe më shumë misteret. Ekspertët thonë se kjo hap skenarë të rinj dhe tani lind pyetja: çfarë ndodhi në të vërtetë me “Bayesian” gjatë mbytjes së anijes më 19 gushtit në Portiçelo të Siçilisë ku vdiqën 7 nga 22 personat në bord? Sipas hetuesve, anija u mbyt për shkak të neglizhencës në bord, e cila shkaktoi një sërë viktimash. Elementi kryesor i hetimit ka të bëjë me derën e lënë gabimisht të hapur e cila kishte lejuar që uji të hynte brenda pak minutash gjatë stuhisë atë natë. Por tani këto dokumente të reja mund të vënë gjithçka në pikëpyetje. Pamjet që me sa duket janë realizuar rreth një çerek ore para tragjedisë nga një pasagjer në jahtin aty pranë, i cili gjithashtu ka kontribuar në operacionet e shpëtimit mund të ndryshojnë historinë e kësaj tragjedie. Mike Lynch, një manjat i sigurisë kibernetike i cili u shpall i pafajshëm disa muaj më parë në një gjyq për mashtrim të dyshuar në SHBA, vajza e tij, një nga avokatët e tij dhe një mik biznesmen së bashku me gratë e tyre vdiqën në mbytjen e anijes “Bayesian”.