Magjistari dhe iluzionisti i famshëm amerikan David Copperfield është akuzuar nga 16 gra për sjellje të pahijshme, sipas një hetimi të The Guardian. Disa prej tyre kanë deklaruar se janë ngacmuar seksualisht nga magjistari që në adoleshencë, ndërsa avokatët e magjistarit thonë se akuzat janë krejtësisht të rreme. Akuzat kundër tij përfshijnë pretendimet se ai drogoi tre gra përpara se të kishte marrëdhënie seksuale me to. Pretendimet kundër magjistarit 67-vjeçar, të cilat ai i ka mohuar, shtrihen nga fundi i viteve 1980 deri në vitin 2014. Gratë që kanë bërë akuza për sjelljen e Copperfield e takuan atë përmes punës së tij si një nga argëtuesit më të suksesshëm në botë. Disa nga gratë deklaruan se vetëm pas lëvizjes në rrjet me hashtagun #MeToo, ato ishin ndjerë në gjendje të flisnin për përvojat e tyre me magjistarin amerikan. I pyetur për pretendimet, Copperfield mohoi çdo lloj akuze. Avokatët raportuan se klienti i tyre “kurrë nuk ka vepruar në mënyrë të papërshtatshme me askënd, aq më pak me të mitur”. Copperfield është akuzuar për sjellje të pahijshme edhe në të kaluarën. Një nga 16 gratë, Brittney Lewis, doli në publik në vitin 2018 me akuzat se ai e kishte droguar dhe sulmuar seksualisht në vitin 1988, kur ajo ishte një modele 17-vjeçare. Por këto pretendime u hodhën poshtë.