Ndërkombëtarët uruan kryeministrin Edi Rama për fitoren në zgjedhjet parlamentare të 11 Majit. Mesazhin e parë Rama e mori nga përtej Adriatikut, teksa kryeministrja e Italisë, Giorgia Meloni, publikoi një foto krah tij, duke theksuar se bashkëpunimi mes tyre do vijojë. “Do të vazhdojmë të punojmë për të konsoliduar më tej lidhjet mes dy qeverive tona dhe për të arritur objektivat e përbashkëta, përfshirë forcimin e stabilitetit në Ballkan dhe përparimin e rrugëtimit europian të Shqipërisë”. Edhe kryeministri i Britanisë së Madhe, Keir Starmer, uroi kreun e qeverisë shqiptare, duke e cilësuar historike fitoren e tij më 11 Maj. “Urime Edi Rama për fitoren tuaj historike në zgjedhje. Pres me padurim të vazhdojmë bashkëpunimin tonë për të sjellë rezultate për njerëzit që punojnë në të dy vendet tona”. Kryeministri i Spanjës, Pedro Sanchez, uroi gjithashtu Ramën për fitoren e mandatit të katërt qeverisës. “Urime Edi Rama për fitoren bindëse të Partisë Socialiste në zgjedhje. Shqiptarët mbështesin në masë dërrmuese përpjekjet për ta çuar Shqipërinë në Bashkimin Evropian”. Një mesazh urimi për Ramën erdhi dhe nga kryeministri i Kroacisë, Andrej Plenkoviç. “Urime Kryeministrit Edi Rama për fitoren në zgjedhje! Pres me padurim forcimin e mëtejshëm të marrëdhënieve dypalëshe dhe vazhdimin e bashkëpunimit në kuadër të NATO-s dhe forumeve të tjera ndërkombëtare”. Edhe Presidenti i Ukrainës, Volodymyr Zelensky, i dërgoi një mesazh urimi Ramës për fitoren e thellë në zgjedhje. “Urime për Edi Ramën dhe Partinë Socialiste për fitoren bindëse në zgjedhje. Ju uroj sukses në shërbim të popullit shqiptar. Mezi pres të forcojmë edhe më tej marrëdhëniet miqësore mes vendeve tona, për të mirën e të dy kombeve tona”. Kryeministri shqiptar shprehu mirënjohje për të gjithë urimet e liderëve të huaj, ndërsa iu drejtua Melonit me fjalët “Faleminderit motër! Më e mira mes dy vendeve nuk ka ardhur ende”.