“Chris LaCivita, një nga arkitektët e rikthimit të Donald Trump në Shtëpinë e Bardhë në vitin 2024, po përdor të njëjtën strategji për Sali Berishën”. Kështu shkruan gazeta e njohur amerikane “Wall Street Journal”, në një shkrim kushtuar konsulentit të njohur politik në Shtetet e Bashkuara, Chris LaCivita, aktualisht strategu i fushatës elektorale të opozitës në Shqipëri. “Gjatë një mbrëmje në Tiranë, kryeqytetin e Shqipërisë, një amerikan përshkoi një turmë të zhurmshme me mijëra vetë, u ngjit në skenë dhe bëri një pyetje: “Kush është gati ta bëjë Shqipërinë të madhe sërish?”, ky amerikan ishte Chris LaCivita, një nga arkitektët e rikthimit politik të Donald Trump-it në 2024, pavarësisht dhjetëra akuzave penale. Ai tani po përpiqet të përsërisë atë strategji për Sali Berishën, një ish-kryeministër i vendit ballkanik, i cili përballet vetë me akuza për korrupsion dhe është i sanksionuar nga SHBA”, shkruan gazeta amerikane. Sipas “Wall Street Journal”, në Shqipëri, Chris LaCivita ka folur në tubime të mëdha, ka marrë pjesë në disa thirrje Zoom me mijëra shqiptarë, ka udhëtuar tri herë në këtë vend, është shfaqur në ngjarje të ndryshme publike dhe është kthyer në një objektiv për kundërshtarët dhe përkrahësit njëkohësisht. Ai shpesh i zhvillon takimet nga zyra e tij në Virxhinia. Gjatë këtij procesi, vijon më tej shkrimi, ai është bërë një figurë qendrore në një vend me rreth 2.7 milionë banorë përpara zgjedhjeve të 11 Majit.