Në një vizitë të shkurtër, të mërkurën ka qëndruar në Kosovë, Presidentja e Komisionit Evropian, Ursula von der Leyen. Ajo është takuar me presidenten e Kosovës, Vjosa Osmanin e kryeministrin në detyrë, Albin Kurtin. Këtë të fundit nuk e takoi në zyrën e tij në objektin e qeverisë, por në hapësirat e ndërtesës së parlamentit. Në shkuarje von der Leyen la tre porosi për Kosovën. “Për këtë, është e rëndësishme që Kosova të vazhdojë ndërtimin e institucioneve të sigurta. Të depërshkallëzojë tensionet në shtet. Dhe po ashtu, Kosova duhet t’i finalizojë hapat e domosdoshëm për të përfituar nga Plani i Rritjes”, shkroi shefja e Komisionit Evropian. Presidenca e Kosovës njoftoi se janë diskutuar një mori çështjesh, duke nisur me zotimin që Kuvendi i Kosovës të miratojë pranin e rritjes tash pas konstituimit, heqjen e masave ndëshkuese nga BE-ja që rëndojnë mbi Kosovën, formimin e qeverisë e deri te zgjedhjet lokale. Kryeministri në detyrë, Albin Kurti, njoftoi se me von der Leyen diskutuan po ashtu edhe për zgjedhjet lokale. “Theksoi rendësinë për një tranzicion të rregullt të pushtetit në komunat ku do të ketë ndërrim të qeverisjes, në respektim të plotë të kushtetutës dhe ligjeve të Republikës së Kosovës si dhe përkushtimin e qeverisë për të mbrojtur proceset demokratike nga çdo ndërhyrje e jashtme”, u tha në njoftimin e kryeministrisë. Tutje u tha se Kurti ka theksuar nevojën që Komisioni Evropian të dorëzojë pyetësorin për anëtarësim dhe dhënien e statusit të vendit kandidat për Kosovën. Presidentja e Komisionit Evropian, Ursula von der Leyen pas Kosovës shkoi në vizitë në Maqedoninë e Veriut.