Kur kanë mbetur edhe dy vazhdime të seancës konstituive para afatit të përcaktuar nga Gjykata Kushtetuese, Lëvizja Vetëvendosje ka intensifikuar përpjekjet për marrëveshje. Kryetari i partisë që doli e para në zgjedhje dhe njëkohësisht kryeministri në detyrë, Albin Kurti njoftoi se i ka bërë një ofertë konkrete, kryetarit të NISMA-s, Fatmir Limajt, të cilin e takoi të shtunën. Kurti njoftoi se para 26 korrikut, afatit të përcaktuar nga Gjykata Kushtetuese për konstituim të Kuvendit, do bëhet e ditur nëse ka ose jo marrëveshje mes Lëvizjes Vetëvendosje e NISMA-s. Albin Kurti nuk dha detaje për ofertën që i ka bërë NISMA-s, në përpjekje për t’i dhënë zgjidhje ngërcit politik. Megjithatë, në konferencën e së hënës, si kryeministër në detyrë, Kurti adresoi edhe kërcënimet e presidentit të Serbisë, Aleksandar Vuciq, të cilat i bëri pas arrestimit të ndihmësit të drejtorit të së ashtuquajturës Zyra për Kosovë në Qeverinë e Serbisë, Igor Popoviq. Kurti akuzoi Serbinë për nxitje të tensioneve. Të dielën, Gjykata Themelore në Prishtinë i caktoi masë të sigurisë, paraburgim prej një muaji Igor Popoviqit, për nxitje të përcarjes dhe mosdurimit. Popoviq, më 18 korrik në Hocë të Madhe të Rahovecit, gjatë një fjalimi para serbëve lokal e ka cilësuar Ushtrinë Clirimtare të Kosovës si terroriste. Ai u arrestua po të njëjtën ditë.