Albin Kurti prezantoi para deputetëve të kuvendit të Kosovës, programin qeverisës për vitet 2021-2025, i cili fokusohej sipas tij në dy prioritete më urgjente: menaxhimin e pandemisë së shkaktuar nga COVID-19, dhe lehtësimin e pasojave ekonomike dhe sociale të shkaktuara prej saj. Sipas kryeministrit kosovar, prioritet i qeverisë është sigurimi i vaksinave. Jemi në rrugë të mirë për imunizimin e 60 përqind të popullsisë deri në fund të vitit 2021… Kurti shtoi se qeveria është e interesuar për debat me opozitën e për shkëmbim të mendimeve dhe ideve rreth fakteve të përbashkëta që përmirësojnë jetën e qytetarëve dhe zhvillojnë demokracinë. Fjalë këto që ranë në veshin e shurdhër të kundërshtarëve politike. Në fakt, partitë opozitare e kritikuan planin e ekzekutivit për katër vjet e ardhshme, duke e cilësuar atë pa përmbajtje, sipërfaqësor, dhe pa referenca të qarta financiare. Në këtë fletushkë të quajtur program nuk ka asgjë nga ajo që u premtua derisa Kurti ishte në opozitë… Partitë opozitare kërkuan që ekzekutivi të japë një pasqyrë të qartë të rrugës së do të ndjekë Prishtina në dialogun me Beogradin. Kurti u shpreh se për shumë çështje, pushteti dhe opozita mund të mos pajtohen, por të paktën të gjejnë gjuhën e përbashkët në raport me politikën ndaj Serbisë.