Kryeministri i Kosovës, Albin Kurti, shpjegoi se pas krizës energjetike që pllakosi vendin, zgjidhja duhej gjetur tek kufizimet e energjisë ose shtrenjtimi i saj. Ai u shpreh se kanë arritur ta stabilizojnë furnizimin me energji dhe se reduktimet pothuajse jane hequr. Në faqen e tij në Facebook, Kurti shpjegoi çmimet e importit janë shtatëfishuar dhe një megavat energji një javë më parë kushtoi 515 euro. Cmimet e larta të importit janë pasojë e faktorëve të jashtëm, ndërsa dobësimi i kapaciteteve është rrjedhojë e shkaqeve të bbrendshme, tha ai. Megjithatë, më tej sqaroi se gjendja po shkon drejt normalizimit. “Me shtimin e likuiditetit dhe subvencionimin e importit kemi arritur të stabilizojmë furnizimin dhe reduktimet pothuajse janë hequr”, thuhet në postimin e tij. Kreu i ekzekutivit tha se po mundohen të riparojnë problemet në bllokun B2, pasi sipas tij, as gjysma e konsumit nuk mund të mbulohet nga prodhimi i energjisë elektrike në termocentralet “Kosova A” dhe “Kosova B”.“Janë dy faktorë të brendshëm që na kanë sjelle në këtë krizë. Mungesa e vizionit për zhvillim socio-ekonomik të Kosovës, me planifikim të sektorit energjetik për furnizim të qëndrueshëm dhe çmime të përballueshme, së dyti, korrupsioni qeveritar i bërë zakon, e që kulmoi me privatizimin e rrjetit të shpërndarjes dhe furnizimit për vetëm 26 milionë euro”, pohoi Kurti. Në 22 dhjetor, autoritetet njoftuan se do të ketë reduktime për të gjithë konsumatorët.Për shkak të krizës me energjinë elektrike, Qeveria e Kosovës më 24 dhjetor vendosi masa të emergjencës në furnizim të energjisë elektrike, të cilat do të vlejnë maksimalisht 60 ditë.