Kryetari i Lëvizjes Vetëvendosje, Albin Kurti, ka theksuar se synimi kryesor i partisë që ai drejton në zgjedhjet e sotme është arritja e një rezultati mbi 50 për qind të votave, duke e cilësuar këtë si kusht të domosdoshëm për qeverisje të qëndrueshme. Në një intervistë për RTK, Kurti u shpreh se vetëm një mandat i fortë dhe i qartë elektoral do t’i mundësonte Vetëvendosjes të marrë vendime të rëndësishme në fushën e sigurisë, zhvillimit ekonomik dhe mirëqenies së qytetarëve, pa u përballur me bllokada politike apo pengesa burokratike. Ai foli edhe për raportet me subjektet e tjera politike, duke lënë të kuptohet se në rrethanat aktuale bashkëqeverisja është e vështirë. Sipas tij, klima politike e krijuar e bën pothuajse të pamundur ndërtimin e një koalicioni funksional në këtë fazë.“Pavarësisht atmosferës së rënduar, nuk po e shoh si reale mundësinë e bashkëqeverisjes. Në anën tjetër, nëse nuk kemi qeveri edhe për dy muaj si qeveri në detyrë, me vetëm një të 12-in e buxhetit, mund të kemi buxhet. Por në mars ngelim pa asgjë, duke shtuar faktin se më 4 mars është afati kur duhet të zgjidhet ose rizgjidhet presidenti. Ne kemi obligim për bashkëpunim, sidomos në fazat e mëvonshme, mirëpo tani na duhet fitore mbi 50% që të ecim mbarë, mirë dhe shpejt.” tha Kurti, duke shtuar se bashkëpunimi institucional mbetet detyrim, por në faza të mëvonshme. Në këtë kontekst, ai ritheksoi se një fitore mbi 50 për qind do t’i hapte rrugë një qeverisjeje efikase, që të veprojë shpejt dhe pa pengesa. Kurti përmendi edhe precedentët e mëhershëm, duke rikujtuar zgjedhjet e 14 shkurtit 2021, kur Vetëvendosje doli fituese bindshem dhe procesi i formimit të qeverisë u zhvillua pa vonesa.