Kryeministri i Kosovës Albin Kurti, beson se anëtarësimi i Kosovës në NATO do vijë më shpejtë se anëtarësimi në Bashkimin Evropian. Në një diskutim në Shtëpinë e Kosovë në Davos të Zvicrës ai shton se kjo mund të bëhet për shkak të rrethanave gjeopolitike. Ne duam t’i bashkohemi BE-së dhe NATO-s, sepse i duam të dyja – të përfitojmë dhe të kontribuojmë. Fillimisht, me shumë mundësi ne do të anëtarësohemi në NATO. Derisa ballafaqohemi me agresionin rus në Ukrainë, që po ashtu ka ndikim edhe në Ballkan, ne duam të përshpejtojmë anëtarësimin tonë në NATO” Kurti ka shtuar se Bashkimi Evropian nuk është Evropë pa Ballkanin Perëndimor. “Ne duam anëtarësimin në NATO, por edhe në Bashkimin Evropian, sepse mendoj se ne jemi në Evropë, por Bashkimi Evropian duhet të bëhet Evropë, pasi ende nuk është. Me përfshirjen e Ballkanit Perëndimor, BE-ja do të bëhet Evropë ku ne tashmë jemi” Shefi i Qeverisë së Kosovës të martën ka udhëtuar për në Zvicër për të marrë pjesë në Forumin Ekonomik Botëror në Davos. Të mërkurën ai ka nënshkruar marrëveshjen për Tregtinë e Lirë me vendet e EFTA-s, për çka tha se u hapë rrugë bizneseve të Kosovës për më shumë eksport. Mes tjerash Kurti ka takuar edhe liderë botëror. Ndërkohë që në forumin në Davos po merr pjesë edhe emisari i Bashkimit Evropian për dialogun Miroslav Lajçak që të mërkurën ka takuar presidentin e Serbisë, Aleksandar Vuçiq me të cilin kanë diskutuar për Marrëveshjen për Normalizim të marrëdhënieve. Pas takimit, emisari që është në fund të mandatit tha se "Progresi i mëtutjeshëm është në interes të Serbisë, Kosovës, Bashkimit Evropian dhe të ardhmes së tyre".