Një sherr me sende të forta mes dy personave ka ndodhur mesditën e kësaj të hëne në Kamëz. Dyshohet se për motive të dobta, në mes të rrugës, dy drejtues automjetesh kanë ndaluar dhe janë përplasur fizikisht, duke përdorur gurë dhe sende të forta. Nga ky sherr mbeti i plagosur 38-vjeçari Redi Vata, i cili ndodhet në spitalin e Traumës, me dëmtime në kokë dhe gjoks, por jashtë rrezikut për jetën. Sikurse duket nga pamjet, në vendin e ngjarjes u gjet automjeti tip “Benz” i dëmtuar në xham, që drejtohej nga 38 vjeçari. Ndërkohë policia është në kërkim të personit tjetër të përfshirë në konflikt, i cili dyshohet se është larguar nga vendi i ngjarjes me një automjet tip “ML”. Dyshohet se gjatë konfliktit është qëlluar me armë zjarri, pasi në vendin e ngjarjes është gjetur edhe një gëzhojë, e cila e cila po verifikohet. Policia thotë se po punohet për identifikimin dhe kapjen e drejtuesit të automjetit tjetër të përfshirë në konflikt ndërsa po këqyren edhe kamerat e sigurisë në zonë.