Arrestimi i shtetasit malazez Risto Jovanovic, katër ditë më parë në Kosovë, mund të shkaktojë thellim të krizës së brendshme politike në Mal të Zi, që pervecse komplekse, mund të acarojë dhe marrëdhëniet diplomatike midis Kosovës dhe Malit të Zi, thote REL. Policia e Kosovës e arrestoi Jovanovicin më 28 qershor në Gazimestan, gjatë shënimit të Vidovdanit, pasi, siç pohoi policia, ai kishte brohoritur thirrje nacionaliste dhe kishte përdorur gjuhë që nxit urrejtje. Para gjykatës në Prishtinë, ai i mohoi këto pretendime të prokurorisë. Megjithatë, gjykata i dha 30 ditë paraburgim. Për shkak të arrestimit të Risto Jovanovicit në Kosovë, në Mal të Zi, për të tretën herë protestuan dhjetëra qytetarë, pranë ndërtesës së Qeverisë malazeze, ku njoftuan se do të radikalizojnë protestën “nëse Qeveria nuk bëhet më aktive sa i përket këtij rasti dhe nëse Jovanovic nuk lirohet”. Duke folur për pasojat e mundshme të ketij rasti në raportet midis Kosovës dhe Malit të Zi, analisti politik nga Prishtina, Agron Maliqi, nuk e përjashtoi mundësinë që gjërat të shkojnë në drejtim negativ. “Kur diçka bëhet çështje e politikës së brendshme në një vend dhe e presionit politik, gjithçka është e mundshme, sidomos në kontekstin e një brishtësie shumë të madhe të Qeverisë së atjeshme (të Malit të Zi)”, eshte shprehur ai.