Nga dita e hënë, në mbarë Kosovën mësimi në të gjithë nivelet e arsimit parauniversitar do të vazhdojë me pjesëmarrjen fizike të nxënësve në shkolla. Përmes një postimi në Facebook, ministrja e Arsimit, Arbërie Nagavci, shpjegoi se vendimi u mor në bashkëpunim me Institutin Kombëtar të Shëndetësisë Publike të Kosovës dhe institucionin që ajo drejton. Nxënësit e arsimit parauniversitar, duke përjashtuar këtu ciklin e ulët nga klasa e parë deri në të pestën, e kishin zhvilluar mësimin online që prej 12 prillit, një nga masat e marra prej qeverisë per frenimin e përhapjes së pandemisë. Këto javët e fundit, Kosova është përballur me një shtim të numrit të infektimeve me koronavirus, por edhe të viktimave nga Covid 19. Të enjten, Instituti Kombëtar i Shëndetësisë Publike atje raportoi për 17 jetë të humbura dhe 600 raste të reja brenda 24 orësh. Aktualisht, rastet aktive në vend janë gati 13 mijë.