Pak orë para mesnatës ka përfunduar procesi i rinumërimit të votave nga zgjedhjet e 28 dhjetorit. Komisioni Qendror i Zgjedhjeve të shtunën do të shpallë rezultatet përfundimtare pas stërzgjatjes së procesit. Deri te rinumërimi erdhi për shkak të manipulimit me votat e kandidatëve për deputetë. Si rrjedhojë e kësaj skeme rreth 200 komisionerë e vëzhgues u intervistuan nën dyshimin për falsifikim të rezultatit zgjedhor, 35 ndodhen në paraburgim, një pjesë e tyre edhe nën dyshimet për marrje ryshfeti e kanosje. Intervistimet e ndalimet e komisionerëve ndodhën në Prizren ku dyshohet se u manipuluan mbi 69 mijë vota e në Malishevë ku u devijuan rreth 17 mijë vota. Hetimet për falsifikim të rezultatit zgjedhor kanë nisur edhe në Drenas e Obiliq. E sipas të dhënave të Komisionit Qendror të Zgjedhjeve kandidati me më së shumti vota të manipuluara rreth 7 mijë është Fetah Paçarizi i Partisë Demokratike të Kosovës, pasuar nga bashkëpartiaku Nait Hasani me mbi tre mijë vota të devijuara. Edhe brenda listës së Lidhjes Demokratike të Kosovës u aplikua e njëjta skemë e mashtrimit me rezultat zgjedhore, ku sipas të dhënave mbi një mijë vota të manipuluara ka Xhavit Uka i pasuar nga Driton Selmanaj. Në Lëvizjen Vetëvendosje, Taulant Kelmendi është kandidati në favor të së cilit punoi skema e manipulimit duke ia shtuar mbi 900 vota. Pas shpalljes së rezultateve të shtunën, duhet të pritet po ashtu afati i ankesave për certifikim të rezultatit e kjo i hapë rrugë nisjes së procedurave për formimin e institucioneve.